انا والحرمان العاطفي

[المحرومه]

السلام عليكم ورحمة الله وبركاته

هذي اول مشاركه لي واتمنى الاقي منكم التفاعل
انا متزوجه من عشر سنوات تقريبا,زوجي انسان طيب لاتنقصه صفات الرجوله (رجل بمعنى الكلمه)ولكن:
اعاني معه من الحرمان العاطفي,فهو لايعبر عن حبه لي لابعبارات الحب,ولابالتصرفات,ولايبدي لي اي نوع من الاهتمام,
العطاء في نظره ان يوفر لي الاكل والشرب والملبس.
اما العطاء العاطفي فهو معدوم ,لدرجة اني احس في بعض الاحيان انه لايحبني,وعندما اساله عن هذا الشعور,يجيبني بان الدليل على محبته لي هو انجاب الاطفال مني,ورضاه بالعيش معي.
وانااحس باني في اشد الحاجه للحنان الذكوري خصوصا واني حرمت منه من ابي,حيث انه جاف في التعامل معنا.
ناقشت زوجي في هذا الموضوع مرااات ومرااات .ولكن وفي كل مره (لااااااااااحياة لمن تنادي).
حاولت ان اتعايش مع هذا الوضع واقنع نفسي بقبول الامر,ولكن لم استطيع ذلك,فحاجتي للحنان والحب من زوجي تؤرقني دائما ,وتعكر صفو حياتي وتدمر نفسيتي.
ارجوكم ساااااعدوني....ارشدوووووني
ماذا افعل؟؟

اختكم.........المحرومه

[النظرة الخجولة]

اختي المحرومة تعاطفت مع مشكلتك ودي اقدم لك نصيحتي واتمنى تفيدك اوتخفف على الاقل عنك....
يااختي انتي تسمين نفسك محرومه وانا اشوف ان حرمانك من شي واحد وهو العاطفة
لكن ماشاء الله ربي انعم عليك:
1- بزوج شهم وكريم يعني مثل ماذكرتي رجل بعنى الكلمه وهذه صفة لابد ان تحمدي الله عليها وتتذكريها دائما.
2- اطفال وهذي من النعم التي يحلم بها البعض فهم زينة الحياة
3- زي مافهمت منك انك راضية فيه وهو ايضا راضي ومقتنع فيك يعني مافكر لاسمح الله
يبحث عن غيرك وهذي نعمه يااختي يفتقدها الكثير.
واعتقد انتي اعلم مني بالاشياء الايجابيه الاخرى في حياتك
وانا لمن ذكرت لك هذه النقاط ما اقصد اني استصغر مشكلتك ...ابدا
لكن القصد انك لمن تحاولين تحلين مشكلتك فكري بالاشاء الايجابيه في حياتك والامور اللي قدمها لك
اما بالنسبة لمشكلتك : الرجال يعبرون عن حبهم واخلاصهم للمرأة بالافعال وقليل منهم يقدر يعبر بالكلام وانتي ماذكرتي معاملتك لزوجك..كيف؟ هل انتي تقدمين له الحب والحنان وتسمعينه دائما الكلام الحلو اذا كانت ايجابتك لا فأسمحيلي التقصير منك
اما اذا كانت نعم لابد انك توضحين له شعورك لكن بعد ماتمدحينه يعني تقولين له
حبيبي انت ماقصرت معاي في اي شي واذكري له الامور الايجابيه اللي فيه
بس اتمنى اسمع منك عبارات حب وغزل وصدقني راح اكون اسعد انسانه وتكون معي بإذن الله سعيد وحياتنا بتتغير دائما للأفضل .
وحاولي تسوين ليلة رومانسية بعيد عن الاطفال وعلى ضوء الشموع افتحي معاه الموضوع بس بكل حب وانتي هادئة ومبتسمة ولو تكونين ضامته وتتكلمين يكون افضل (انتي ادرى بزوجك والشي اللي يحبه)
والله يسعدك وبإذن الله تفرج
لاتنسين تطمنيني:)

[طفله]

هلا حبيبتي ....نورتي المنتدي بحضورك
واقولج النصيحه واتبعيها واصبري عليها يمكن نتايجها ماتكون سريعه مثل مانتي
تبغين ؟؟؟؟؟
اوكيه انتي ابدي في الحركات والدلع (فديتك.حبيبي.عمري.حياتي.قلبي.غناتي.)ولا تذكرين
اسمه ابدا يوم يناديك( لبيه .هلا عيوني.)
واعطيه من الكلام هذا واللــــــــــــــه ييتغير 180 درجه
وارسليله على الموبايل عبارات حب رومنسيه ومقاطع قصايد
وشوفي كيف بيتغير اسلوبه ولا يصيبك احباط اذا ماتجاوب معاك اعطيه مهله
لانه مو متعود
اتمني تستفيدين من النصايح ( ارجوك سوي اللى قلته)
وقولى لى شو صار معاك حتي لو بعد سنه ههههههههههههههههههه<<< تبغي تعرف ملقوفه
تحياتي لك الغلا

[حرير]

هلا فيك محرومه في المنتدى
وان شاء الله اتحصلين الحل
ولا تشيلين هم كل شي وله حل
والاعضاء ماراح ايقصرون معاك
اسمعي كلامهم وطبقي
والله يوفقج
حرير

[هدوء]

المحروم استحاله يعطي الا بعد مايشبع وانتي اشبعيه..
مثلا بغرفة النوم اذا نام افتحي ايده ونامي على صدره اول مره بيسكت الثانيه بيبعدك وانتي ماعليك منه اذا بعدك قربي له واذا اعطاك ظهره روحي له من قدام خليك مثل ظله لحد مايتعود عليك..
واذا تعود على حضنك بالليل بااذن الله انه بيبدى بالكلام الحلو..

بس احذرك من شي اذا عصب عليك وقال ابعدي عني حطي في بالك ان اللي قدامك طفل صغير وانتي امه ولاتعتبين عليه

[المحرومه]

اخواتي:
النظره الخجوله...طفله...حرير...هدوء
اشكركم على التفاعل معي والرد على موضوعي.
احب اوضح لكم بعض النقاط:
-انا معكم اني في نعمه غيري محروم منها,واحمد ربي واشكره على كل شيء.
-بالنسبه لي والله العظيم ماقصرت معاه في اي شيء,مخليته اولى اولوياتي,مشبعته من جميع النواحي,اسمعه كل لحظه احلى عبارات الحب والشوق والوله وكانه عشيق وليس زوج,مهتمه بشكلي الداخلي والخارجي
من تغيير وتفنن وابداع,مولعه له اصابعي العشره,ولو يطلب عيوني ماقصرت.
-حاولت معه بشتى الطرق ,هيات الجو وناقشته في هالناحيه مراااات ومراااات,وكانت دايما اجابته ( اكبر دليل اني احبك اني مستمر في علاقتي معك,انجبت اولادي منك,بقائك معي في المنزل )
اسالكم بالله هل هذا يغني عن العطاء العاطفي؟؟؟
هل هو بديل عن عبارات الحب والحنان والاشباع الروحي ؟؟؟
هل كل زوجه ابقاها زوجها في بيته وانجب اولاده منها واستمر في علاقته معها,دليل على حبه لها؟؟؟وهل هي مكتفيه بهذا الشيء مع الغاء الاحتياجات الخرى؟؟؟
-اذا كنت احتاج للغذاء...للشرب...للملبس...حتى اعيش
فما اللذي يمنع من توفر الاحتياجات النفسيه..الروحيه...حتى اعطي
-اذا كانت هذه الرغبه تلح على وباستمرار..فماذا علي ان افعل؟؟؟

اعذروني ...ففرحتى بتفاعلكم...دفعتني لاخراج مشاعري لكن
دمتم......................بود

[النظرة الخجولة]

ياأختي محرومة
انا اعتقد انك ماراح تتأكدين من حبه لك الا اذا عبر بكلام الحب والغزل
انا معاك كل وحدة منا يهمها ان زوجها يعبر لها بس انا اشوف ان الموضوع (بعد ماقرأت ردك )
يحتمل شيئين :

_ اما انك اسمعتي زوجك الكلام الحلو (بزيادة)لدرجه انك مااعطيتيه فرصه يسمعك (وهذي تحصل كثير) يعني دائما وفي كل وقت انتي تبادرين وتشبعينه من الكلام الحلو.
الحل: اعطيه فرصه او اسأليه مثلا : في هذي اللحظة او المناسبه اش تحب تقول لي؟؟؟

_ او انه مايعرف يعبر وهذا شي طبيعي
الحل: ممكن تساعدينه وتهدينه كتاب شعر او خواطر اوكتاب الافكار الرومانسية للرجل متوفر في المكاتب
او اشتري دفتر شكله حلو واتفقي معاه تكتبون فيه كل يوم كلام حلو او موقف اسعدكم (فكرة رائعه) ان شاء الله تساعدك
وحطي في بالك ان كل شخص له طريقته في التعبير عن الحب

قلبي معك ودعواتي لك

[المحرومه]

هلا والله اختي النظره الخجوله
فعلا انت صادقه في كلامك اني مشبعته بزياده بس صدقيني كنت في كل مره اعطيه فرصه عشان يعبر عن مشاعره واحاول اساعده في هالشي......جبت له كتب رومنسيه....كتب عن الشعر......كتب ثقافيه عن فنون الغزل بين الزوجين.....قلت له طيب سمعني اغنيه تحس انها تعبر عن مشاعرك.....ولا فيه اي تقدم
بس انا عندي سؤال :
هل القدره على التعبير تختلف باختلاف المشاعر؟؟؟
اوضح اكثر...اذا كان الزوج لايعبر من الناحيه العاطفيه...ويعبر من الناحيه الجنسيه ,,,طبعا انا اتكلم عن التعبير اللفظي والحركي....فهل هناك فرق في القدره؟؟؟
بمعنى اخر..هل التعبير الجنسي اسهل من التعبير العاطفي؟؟؟
معليش اختي ثقلت عليك....بس ودي ارتاااااااااح.

[النظرة الخجولة]

هلا فيك اختي
وبالنسبة لسؤالك:
هل القدره على التعبير تختلف باختلاف المشاعر؟؟؟
احيانا تختلف واحيانا لاوايضا من شخص لاخر على حسب فكرة الشخص عن التعبير ..يعني ممكن يكون يشوف ان التعبير بالهدايا او بتلبية طلبات الطرف الاخر اوبالكلام او بأي شي ثاني
وبالنسبة للرجل اكثر شي يعبر بالفعل ومرات بالكلام
يعني اللي ابغى اوصله لك انك ماتقدرين تتوقعين طريقة الشخص الاخر في التعبير عن عواطفه
لانه ممكن يشوف طريقته في التعبير هي اكثر طريقة لتوصيل مشاعره للاخر وانتي تشوفين طريقته غير معبرة اوغير كافية والعكس صحيح
وسؤالك
هل التعبير الجنسي اسهل من التعبير العاطفي؟؟؟
بصراحه انا ماعندي اجابة اكيدة لسؤالك هذاوحسب معلوماتي ان الجنس اسهل بالنسبة للرجل
واتمنى تلاقين رد من الاخوان والاخوات بخصوص هذا الموضوع
ونصيحتي لك :
هدي بالك ولاتفكرين كثير في الموضوع لانه ممكن يأثر على اشياء ثانية لاسمح الله
وألجأي للدعاء بأن ربي يهدي سرك ويريح بالك ويسخر لك زوجك ويعينه انه يعبرلك عن مشاعره لتهدى نفسك وتهنى بإذن الله:)

[غزلان]

افا بس يالغلا هونيها بس وحاولي تتأقلمين يالغلا مهما كان هذا زوجج

[المحرومه]

اختي النظره الخجوله
الف شكر على ردودك وتفاعلك معي
واعذريني تعبتك معاي
اختي غزلان
مشكوره على مرورك الجميل

[القلب الجريح]

الإعضاء ماقصرو في النصايح

ووجهة نظري

مشكلتك (وهم في وهم)

والزوج اللي يخليك في سعادة دائمة وما يقصر عليك بشي ويختصر الطريق إلى قلبك (بالأفعال لا بالأقوال)

أفضل مئة مرة من الزوج اللي (بياع كلام)
ولسانه يلوط أذانه ويقول مالا يفعل (شاعر في المشاعر)
وفي أبسط ظرف (عمى أو إعاقة أو أي مشكلة صحية لا سمح الله) يتخلى عن محبوبه

زوجك أختي الكريمة يعرف معنى الحب ويعرف معنى الحياة الزوجية
وكلامه لك بأنه لو مايحبك ماعاش معاك يدل على أنه غير منافق

ويدل على أنه ما يجامل في علاقاته وإذا حب أعطى << وهذا المهم

وأعتقد زوجك لو مهما صار ماراح يتركك أبد أبد أبد

أتمنى منك أختي الإبتعاد عن الأوهام والرضا بما أعطاك الله وعدم التذمر والتشكي لأن هذا ما يريدهـ الشيطان

وإذا تبغين زوجك يكون أفضل أشكري الله على النعمة
بالشكر تدوم النعم وتزداد ((ولأن شكرتم لأزيدنكم))

آسف على الإطالة
وردي كان بدافع الأخوة وأتمنى تتقبيله بصدر رحب

[اخر الكلام]

ياقلبي فكري في ايجابيات حياتك معاه وتعرفين نعمه فكري في الناس المحرمومه والحريم المتبهذله في حياتها ولا حتى امن في حياتها ماتحس فيه
احمدي الله ولاتخلين الشيطان يسيطر عليك من هذي الناحيه وينكد عليك عيشتك وينسيك اشياء اهم واجمل في حياتك مع زوجك ويخليك تفكرين تفكير سلبي او (افكار مش مزبوطه)
وزوجك خليك وراه لا تيأسين منه
وراه وراه وين بيروح الين ما تعلمينه :m315:
والله يوفقك ويسخره لك

[اسمهان]

كلامكم كله صح بس المراة بطبعها تحب تسمع من يمدحها ويثني عليها ويحسسها انها انثى ..........اوكيه هو \طيب وكريم بس قلبها له حق وروحها ومشاعرها الورد يموت لو منسقى وحد رعاه وانتبه له الين متى نعطي ولا ناخذ

[المحرومه]

اختي القلب الجريح
انا ولله الحمد والمنه دائمة الشكر لله على كل شيء....
وبالنسبه لكلامك ان وضعي كله وهم في وهم اسمحيلي اقولك انك غلطانه ...لان مايحس بالنار الا رجل واطيها...وبعدين من قال لك انه يعبر بالافعال ؟؟؟
حتى التعبير الفعلي ما طلعه..يعني على سبيل المثال...تعبت مره من المرات ,وطحت على الفراش كم يوم,حراره وكحه وخمول وعدم اكل....الخ
الوضع الطبيعي بين اي زوج وزوجته انه يقول سلامات..وش تشتكين منه..ماتشوفين شر..اي شيء من هالكلام,,,,,بس في حالتي مافيه اي سؤال.
لنفترض انه مايعرف يعبر بالكلام......الفعل وين راح له؟؟؟؟؟؟
يحط كمادات..يعطيك مويه للشراب...يطل عليك بين فتره وفتره...يساعدك اذا بغيتي تقومين..
هذا بعد تسمينه تذمر وتشكي...وانا بس عطيتك مثال بسيط جدا وياما عندي من الامثله اذا بغيتي تعرفينها..
وعندي سؤال اتمنى تجاوبيني عليه
المشاعر والاحاسيس اذا ماعبرنا عنها بصوره او باخرى.....وش الفايده منها؟؟؟
ومشكوره عالمرور

[المحرومه]

اختي اخر الكلام
حياك الله........
انا معك اني في نعمه والحمد لله على ذلك
بس ترى مهوب حرام ان الوحده تحس بمشاعر زوجها تجاهها.
انا بس ودي ادري اللي ردوا على وما ايدوني في كلامي هم متزوجات والا لا؟؟؟
اتحدى اي وحده تكتفي بالاشياء الماديه,,,وتلغي الاشياء المعنويه..
ياعاااااااااااااالم الحيوانات وهي حيوانات تعبر عن احاسيسها ومشاعرها
بصوره نشوفها حنا يا البشر..
على العموم مشكوره على تفاعلك

[المحرومه]

ياااااااااااحبيلك يااسمهان
والله ماحس بي الا انتي....وتسلمين على تعاطفك معي ...ولا فض فوك
وقولي امييييييييييين جعلك ماتحسين باللي احس به ولا في منامك

[اسمهان]

امين يا قلبي .......واسال الله يكون لك مثل الطفل لامه امين

[بنت عمان]

الله يسعدك

[حبيب بدور]

اختي المحرومه

مع تحفضي على هذا المسمى

انا اشوف ان اللذين سبقوني
النظره الخجوله...طفله...حرير...هدوء

واخونا القلب الجريح

كفو ووفو وماعليك الا ان تهونينها وتهون

واصبري واحتسبي

ان الله مع الصابرين

تقبلي ودي

[النظرة الخجولة]

انا متابعة الردود
وخطرت في بالي فكرة يمكن تفيدك
ليش ماتغيرين اسلوبك معاه لمده يومين مثلا
بمعنى انك ماتقولين له ولاكلمه حب ولاتسألين عنه (مااقصد تزعلين منه ..لا)اقصد سوي هالحركه وانتي عااااادي ومبسوطه(مثل اسلوبه) ولا تبينين انك قاصدة تطنشينه
وشوفي رده فعله اذا سأل وقال ليش متغيره
ردي عليه بدلع وقولي سمعني كلمه حلوة وانا ارد عليك;)
وانشبي فيه الين يتغير

(بس زي ماقلت لك سوي نفسك موقاصدة التطنيش وانك كنتي مشغوله)<<<<<<<<<<والله
حاسه نفسي من هذوليك الحريم القويات:mad:
تكفين ادعيلي ان ربي يسخر لي زوجي ويهديه ويبعد عنه بنات الحرام

[وجـــن]

الله يعينا وياك ياختي
انا ما عندي حل ): لاني اعاني نفس المشكله

ولكن الاخوات كفو ووفو الله يعطيهم العافيه

[المحرومه]

اختي الزعلانه
الله يسمع منك .....ومشكوره حبيبتي على مرورك

[المحرومه]

اخي حبيب بدور
جزاك الله خير.....ويعطيك العافيه على مرورك

[المحرومه]

اختي النظره الخجوله
مشكوره حبيبتي على تفاعلك معي...والله لايحرمك الاجر
وبالنسبه لاقتراحك سبق وسويته مهوب يومين بس الا اسبوع كاااااااامل
لين مليت ورجعت لوضعي الاول (الطبيعي)
ياااااااااعيوني ماخليت شي ماجربته,,,,,بس ما اقول الا رب العالمين
قادر على كل شي,,,,,وربي مايخيب عبده وراجيه
والله يسخر لك زوجك ويهديه ويفتح على قلبه
ويمنع عنه بنات الحرااام.....ويرده لك بكل احاسيسه ومشاعره
امين ياااااااااااااارب

[المحرومه]

هلا اختي وجن
تسلمين على مرورك ياقلبي
ودام معنا رب كريم قادر على مايشاء....صدقيني ماراح نضيع