من لديه نصائح حول ليلة الملكة والشبكة

[Naif_M]

مساء الخير لجميع اعضاء المنتدى
انا شاب مقبل على زواج بأذن الله
تمت الشوفه الشرعية خلال الأسبوع الماضي مع شريكة حياتي
ولانني من منطقة نجد ... جرت العادات ان تكون الملكة والشبكة في يوم واحد
وانا أجهل الكثير عن امور الشبكة ... وانا انسان لم يسبق لي التعامل مع الجنس الناعم نهائياً وخجول للآخر معاهم ... ( مشكله ) و ممكن اني استعين بـ الوالده في بعض الشغلاات اتعلم منها ... بس حنا الآن في جيل جديد ولا أعرف كيفية التصرف وقت ما أكون مع زوجتي وقت الملكة وماهو الحديث اللي راح اتكلم معاها فيه... وماهو الحديث اللي راح يثير انتباها ... وهل يجب وقتها اني اظهر حبي وشغفي فيها واني اسعد انسان بـ الكون وقت ماحصلتها... بس خايف تشوف حالها علي !!!؟ او يجب اني اثقل علها شوي ... وهل يحق لي ان اقبلها وقت ما أشوفها بعد الملكة ... ( لاني خاق معاها بقووووهـ وانتظر الزواج على احر من الجمر )
وكذالك الأمور اللي راح تتبع مابعد الملكة من مكالمات هاتفيه مابيني وبينها
احب اعرف الامور اللي تهتم فيها زوجة المستقبل
لان بعد الشوفه الشرعيه كل مايهمني اني اسعدها ... وادور على اللي يهمها
يفدها المال والعمر ....
ابي نصايحكم ... لاني رايكم يهمني كثير بصراحه
والله يعطيكم العافيه مقدماً

[هدوء]

نـــــــــــــــــــايف

مبارك مقدما>>>>>>>>>>>>>>>مايجوز تقول مبروك لان برك من يبرك مبرك((يبي لها سالفه بالشرح^_^)

المهم..>>>>>>>>>>>>>>>>>تحب الاكشن اللي كذا خصوصا مع اللي مايعرف يدبر عمره..

شوف ياطويل العمر بالنسبه لااسئلتك بجاوبك وبقول لك على اللي ماتطرقت له والبنت يلتفت انتباهها خصوصا اذا لها خوات...>>>>>حركات البنات ((وبنات نجد بزود))

المهم...
بما اني نجداويه يعني لاتقلق عارفه امورهم مررره,,
شوف...

روح -طول الله بعمرك وفقك واياها وجعلكم اسعد مخاليقه يارب,,,((قولوا امين))والمسلمين اجمعين-للسوق..

واشتر الشبكه اذا تبيها الماس قواك الله خذلهابس نصيحه لاتاخذ طقم كبير لانها مارح تلبسه الا بالشبكه والزواج وبعدها بالدرج خذ شي وسط عشان تقدر تلبسه بمناسبات ثانيه...>>>وجه نظر!!
اذا تبي ذهب شوف وش الجديد يعني المّلون لاتاخذ لون واحد اصفر مثلا شوف وش الدارج هاليومين والله يعينك على لسقّه الفلوس الذهب مولعّ:D


بعدين خذ لك ساعه من الدهام >>>اذا شبكتك ذهب خذ الساعه الماس واذا شبكتك الماس وفيك حيل تاخذ ساعه الماس عساك ع القوه
خذ لك دبّله بحاله غير حق الشبكه..
بعدين..
مرّعلى محل عوّد وخذ لك كم كسرة عود طيّب اصلي اللي دخانه ازررررق>>دليل الجوده!!
وتولتين صغار دهن العود..
وبعدين سلمك الله مر على محل كشخه حق تغليف هدايا واوقف على راسه وخل يغلفهم لك بطريقه حلوه رزه مو يحطها بكرتون لا خل يحط لك صندوق ولو حصل تشتريه انت على ذوقك فيه بطيبه والعويس اشكال حلوه واسعارها معقوله او تلاقي في محل العود >>>>عشان حبيبتك مقدما ترفع راسه عند اهلها وتقول زوجي شيّك وكشخه ويفهم با الامور>>>((بنات بس الشكوى لله وسع صدرك))


هذي الشبكـــــــــه خلصنا منها((مو تقول فداها المال والعمر ياللا شد حيلك))
نجي لليوم الملكه...
تمر لك على صالون رجالي وتحلق سكسوكه اذا تليق عليك>>>>البنات يخقون عندها..
او عوارض خليجي الخفيفه مو الثقيله اللي تخوف... المهم اللي يناسبك وتنعم..
وتخليه يقص اظافرك ويبردها عشان اذا شافت يدك وانت تلبسها الخاتم والساعه تحس ان اللي معها متطور مو يقص اظفره مايل ويمش..>>>>شكل اليديعطي انطباع للراحه>>اسئلني..
بعدين طبعا المغرب بتتروش وتتعطر وتحط كريم مو فازلين لو شن حلو:D
وتصلي العشاء وتتوكل على الله وتدعي ربي يوفقك..============
نجي للاكشن:m315:

طبعا كلامي اذا مافي احد من اهلك الحريم بيجي معك>>>وياريت اعرف عندك خوات اولا متزوجات كبار صغار يمكن يوفرون علي الهذره
طبعا انت تدخل الشبكه معك اذا مافيها حريم((اهلك))وتعطيها احد من اخوانها يدخلها لهم جوى>>>عشان يكحلون عيونهم فيها ويقزونها مظبوط وبنفس الوقت انت ترتاح من همها...

نجي دخلت عليها..
طبعا تسلم باليـــــــــــــــــــــــــــــــــــــــــد مو تصير طاير وتبوس اهجد خل البنت ترتاح لان قلبها وقتها طاااااااااااير جايب طبلونه:zr287:

طبعا بيجيبون لك الشبكه وعصير وكيك وحركات المهم سو حركه يعني انك اتكيت وجنتل>>>>>>والله اني عارفه انك منت مسوي شي ((خجول))بس ابراء للذمه عشان لاتقول هدوؤ ماقالت لي ..
خذ الكاس وقول لها مثل مااخترتك شريكة حياتي اختارك تشاركيني كاسي وماراح اشرب لحد ماتشربين>>>>وسو نفسك جدي وقول ماراح اشرب لحد مااشربك..

المهم اذا جيت تقص الكيكه ((طبعا انسى انها تتحرك ذيك الليله))لاتشاورها امسك ايدها وحطها ع السكين وقول لها انتي الانثى راعية البيت وتقطيع الكلك اختصاصك وايدك فوق ايدها وقصوها والله يهنيكم يارب...

بعدين..
تفك الشبكه من تغليفتها((بس انتبه قول للي يغلف لايتفلسف ويعقدها لك خلها تكون سهلة الفتح..
خذ الشبكه وافتحها وقول لها شرايك قبل تلبسها..اذا جاوبت كان بها خير وبركه..
ماجاوبت لاتنصدم عادي..
خذها وافتحها واوقف قدامهاوحط العقد على رقبتها>>>>هنا سو حركة عبط وخلها تطول وهي ماسكه شعرها عشان انت تسكره وسو نفسك بالحسره تسكره و قول لها اعذريني ماعرف بالشغلات هذي بعدين سكره!!

بعدين لبسها الخاتم وقولها قولي امين يارب ارتباطنا يكون سعدّ حياتنا..

اذا جاء دور الحلق>>>>عطها قول لها ممكن تفتحينه ماعرف>>>استعبط!!
بعدين
لبسها الساعه وقول احلى ساعه بحياتي الساعه اللي جمعتني فيك...((طبعا انت تقصد اليوم مو ساعه اليد:p

بعدها تصوير الخ..
اذا طلعوا اخوانها والا قول لهم ممكن تهوونا شوي ابي اجلس مع شريكة عمري..مو تخربها وتقول حبيبتي>>>يبان انك نصاب(مافي حب بيوم وليله))

اجلس معاها قول لها طبعي مو جرئ بس خذت كورسات عشان ماتاخفين مني انا جدا خجول بس لما شفتك من هذاك اليوم وانا غير...الله يخليك لي ويجمعنا على خير وسعاده دووم يارب...

بعدها امسك ايدها ولاتطاع فيها خل لها مجال تقز ك من بين خصلات الشعر اللي تنزل على العيون>>>>فضحت اسرارها بس ماعليش عشانك خجول..
طبعا الكلام بيجر بعض..لاتصير جرئ لدرجه الوقاحه اسمح لي انت الى الان ماتعرف طبع البنت

ثقيله او خفيفه يعني وسيعة صدر او جديه..

ابيك تكون جرئ الجراءه اللي تجيب الراحه مو الجرائه اللي تخوف..
ومابيك جدي ورسمي عشان لاتخاف منك..

احفظ لك كم دعاء قولهم لها وخل تقول وراك امين>>>المغزى ترتاح نفسيا بنفس الوقت انت تسمع صوتها...

اطلب منها رقم جوالها وعطها رقم جوالك...

طبعا بيجي وقت صمت وسكوت لانكم جديدين على بعض

هي بتكون فقط مستمعه..انت بعد لاتكثر هذره لان ترى ماراح تتذكر هي شي من اللي تقوله...
بعدين اذا بغيت تطلع من عندها ((لاتطول نصيحه يعني بعد مايطلعون اخوانها وتبقون بحالكم اجلس نص او ساعه بس مو اكثر))
قول لها نشوف من اطول وقفي شوي وخلها توقف جنبك>>>نوع من كسر الهدوء
وبعدها قول طيب انا استئذن اللحين..توصين شي انتي من الحظه هذي مسئوله مني واي شي تبين انا حاضر...
سو نفسك بتطلع بعدين وقف شوي((خلها تقول وش يبي بعد ))
قول لها ماودك تعطيني ورده من اللي بيدك>>>اذا معاها ورد
وخل هي تعطيك اذا عطتك سلم عليها بيدك وبوسها وامشّ..===================
الجزء الاهم والموووووووووهيم تركب سيارتك وتحمد ربي وتشكره بعدين تجي تصب لي اخبارك:m315:

مو تعبني بالكتابه وبا الاخر تنطنش ترى اذبحك:D

[#الحلا#]

كلام الاخت هدؤ كله حلو وانا صراحه ما ادري عن طباعكم بس لا تطلع بدري حلو انكم تجلسون مع بعض اكبر وقت ممكن
وانا بقولك الاشيا الي صارت لي بلملكه وانت شوف الي يناسبك
انا يوم طلع مني زوجي وكان تقريبا قبل الفجر كلا قال غريبه انه طلع بدري
وشي ثاني اذا بتوس او بتسوي اي حركه انتبه للشباااااااااااااااابيك
الحمدلله ما طحت فيها بس خالتي طلت على يوم انا جالسه معاه وضحكت عليه حاط يده على خده ويطالعني علشان كذا انتبه حتى في المستقبل من الشبابيك
لا تسالتها متى الزواج لانه يوم قال لي الموعد الي هو حاطه في باله صرت انفض خاف وقال نتفاهم بعدين وطلع


اما من ناحيه الكلام الحلو وهالاشيا صدقني عودها على الشي الي انت تبيه منها مو بطريقه الاوامر بالعكس انت قول لها الي ودك هي تقوله لك

واذا حبيت توجه لها بعض الاشيا الي انت تحبها في زوجتك جب لها قصه ان صديقك يقول زوجته تسوي له كذا وانا اتمنى اتزوج علشان انتي تسوين لي كذا

اما من ناحية خجلك فصدقني مايخرب حياتكم وايامكم الحلوه وخاصه هالايام هو الخجل

ونصيحه مني وصدقني اهم شي لاتقول لاحد لو اقرب الناس لك عن اي شي بينكم وفهمها ان هذا مبدأك

[¨°•√♥ بنت الاصول ♥√•°¨]

ههههههههههههههههاااااااااااي


عريس جديد حركتات شوف اهم ش عندي تجي لنا بعدين تقولنا وش صار معك
امش يا خجول ..

بالتوفيق يارب منك المال ومنها العيال ...

انا اتوقع ان الشبكة اكيد اهلك وخواتك راح يساعدونك فيها واكيد عارفين
سلوم اهل نجد بتجهيزها اختيار الهدايا وتغليفها والاشياء هذي ولو حددت من اي
بلد بالرياض او القصيم او وين بالضبط كان ارسلتك محلات حلوه يتفننو بالشغلات
هذي ..
واما التعامل مع زوجة المستقبل ..

لا اثقل يا ابو الشباب لاتهور واترك الامور الدسمه بعدين خلك ثقيل شوي
تبسم معها مازحها امسك يدها لانو سبحان الله مسكة اليد فيها علوم ;)
هذا طبعاً قدام الناس بعدين لما تجلسوا لحالكم حاول تتكلم معها عن نفسك شويه
وتسألها عن نفسها .. لو حبيت تبوس بوس يدها بس مو شي ثاني :d
لانو بعد الملكة خلاص تصير زوجتك بس ما تسوي كل شي خبي اشياء لليله الكبيره

وتمنياتي لكم بالتوفيق وربي يسعدكم

[الفيصل]

http://www.geocities.com/atlal_10/4.gif
"
الف مبروك يالغالي وفالكم التوفيق ولاتنسى تعزمنا ;)

http://www.geocities.com/atlal_10/roos.gif

http://www.geocities.com/atlal_10/4-1.gif

[سعود]

ماقصروا الأخوات
والله يتمم لك بخير :)

[المأذون السريع]

1000 مبروك 0000 موضوع رائع ونصائح رائعة بالذات نصايح الاخت هدوء >>> حلوة لا تحط فازلين ههههه

وا م مشعل والحلا

مشكورين ويمكن لى عودة اذا لزم الامر .

[كلش]

1000 مبروك

[Naif_M]

واااااااااااااو حقيقة ردودكم صدمتني بصراحـه :eek:
حقيقة فوق ماتصورت ... خصوصـاً من الأخت هـدوء الله يعطيها العافيـه
ولا يهنون باقي الأخوات أم مشعل و الحـلا
انا كنت مستعد ادفع فلوس لجل هذي النصايح وحصلتها في منتداكم الغـالي
طبعاً للمعلومية انا من سكـان الرياض واصولي ترجع لمنطقة القصيم ..
بس عندي استفسـارين صغـار :rolleyes:
لما البسهـا العقد ... مادري هي راح تكون مواجهتني ولا ملقيتني قفـاها
لأنو لو مواجهتني ممكن ما أعرف اربطه لأني ماراح اشوف شيء
على غير وجهها يكون قبالي وممكن أرتبك ...
وسالفة الأرتباك هذي انا خايف منها كثير ... لاني أتذكر وقت الشوفه يوم قدمتلي العصير كنت مرتبك والأرتباك يولد الرعشه في اليدين .... وهذي لحالها فضيحه ... لانو وقتها بين علي وانا ماسك بيالة الشاهي والعصير ... وكأنه فيه زلزال بيديني ... زين انه ما تكب كب :confused:
ياخوفي نفس الحاله تجيني وانا البسها الخاتم او أقطع الكيك معاها
حاسس انه بيصير افلام ذاك الوقت... بس انشالله تعدي على خـير
عمومـاً الله يبارك فيكم جميعاً ... والملكه انشالله على يوم الأربعاء القـادم يعني بعد10 ايام
ورااح اذكر لكم مستقبـلاً مقتطافات من ليلة الملكة والشبكة بإذن الله

[¨°•√♥ بنت الاصول ♥√•°¨]

شوف يا نايف انت لازم توصي اهلك وخواتك يكونو حوالينك يكلمونك يوقفون قريب
منك يمكن ما يقدرون يكون يمك علشان التصوير بس اذا شفتهم بتطمن
وتهجد شوي <<< قصيميه بحته ويروح الارتباك وعلى فكره ترى الارتباك دايما
اول الموضوع بعدين يروح ..

بعدين تدرب فالبيت على ربط العقد وفكه لان بعضها يكون صعب وتتوهق وانواع
الضحك بيكون بوقتها ،، ولما تجي تلبسها البنت راح تقرب لك وتساعدك .
خلك ريلاكس

وتراني متحمسه على الاخبار

وبالتوفيق

[هدوء]

نايف ودي اضحك ممكن شوي
ههههههههههههههههههههههههههههههههههههههههههههههههه

شوف....

لا تدرب ولا شي...شوف هي بتكون جالسه جنبك اذا جيت تلبسها العقد خلك شقردي وقول لها ممكن توقفين...لان وانت جالس ماراح تعرف تسكره..

اذا وقفت<<<<<<قل لها بصوت واطي لاحد يسمعك قلها يابعد قلبي:D

اوقف قدامها ولبسها العقد وانت قدامها واطلب منها تساعدك وتبعد شعرها عن رقبتها..((انت هنا غض البصر ولاتشوف رقبتها لمصلحتك)) واذا ماعرفت تسكره رح من وراها>>>>>حلاتها انك تحاول وهي قبالك بعدين تروح من وراها.,,
كذا كذا اصلا عيونها بتكون با الارض وصدقني بتكون مرتاااح حيل قول ماقالت هدوء
بالبدايه بترتبك عشان اخوانها فيه لكن شوي وتهجد وتحس انك قوي وهي عصفور بيدك...>>>راح تستقوي


صدقيني مايبي سالفه كلها تشك تشك...

بس ماقلت لي عندك خوات؟؟؟واسمع ليلة الملكه منت نايم ترى عادي تجي تسهر هنا ونتريق عليك نسئلك عن شعورك استعداداتك يعني اسجواب....:D:D

اسمعني عندك...مو تتملك من هنا وتسحب على المنتدى والا تتزوج وخلاص ترى عاد نوريك الشغل مظبوط:m315::cool:

[Naif_M]

تسلمين على ردك ام مشعـل ... ابروح ادور اقرب عقد عند الوالدهـ واشوف كيف يتفك ويربط
وابحاول أكرر الشغله وانا مغمض :D
وبخصوص الأرتباك ... طمنتيني بصراحـه ... والحين احس اني اكثر ثقه اني بعدي ذيك الليله على خـير بإذن الله

وبخصوص الأخت هـدؤ انتي بـ النسبه لي مدرسه كـامله اتعلم منك ...
والحين عندي كذا شغله رومنسيه بستخدمها وقت الشبكه :cool:
حاسس انو البنت بعد مطلع من عندهـا بتقول وش ذا الرجل اللقطه :eek:
والفضل يرجع لله ثم للأخت هدؤ وام مشعل والحلا
الله يعطيكم العـافيه كلكم ... وبخصوص سؤالك اذا عندي اخوات
حنا عائلة صغيرهـ ... انا أول شـاب اتزوج من اهلي
وأختي اللي تصغرني متزوجه ممكن من سنتين
ومقيمه في الشرقيه لظروف عمل زوجهـا
يعني لحد الآن ماجلست معاها وأخذت علوم ملكتها وقتها لاني ناسي كل شيء

وبخصوص اني بسحب على المنتدى بعد الشبكه مسحييييييييل :D بنشب لكم زيادهـ ... ولاتنسون ورانا زواج وللية الدخله والأمور اللي تتبع بعد ذالك

ومحتاجين لناس توجهنا من خلال خبراتهم السـابقه ;)

ومن يدري لربمـا في يوم من الأيـام تكون زوجتي جالسه بجمبي وادخلها على الموضوع اللي انا كاتبه الحين وأخليهـا تقراء ... كل شيء جـايز
الله يعطيكم العـافيه جميعـاً ... وفي حال طراء أي سؤال في بالي انشالله ماراح تقصرون معـاي
في حفظ الله ورعـايته

[هدوء]

يلا نايف قواك الله...واتصل عليها خلها الله يسلمها تجي الاسبوع هذا عشان تنسق معك امورك الشبكه والتغليف...
لان ماراح يمديها بيوم وليله....وبعد تساعدك انها تشتريها...تعرف ذوق البنات ..

نايف بتلاقينا اكثر من اخوان لك هنا بعد الشبكه والزواج ان شاء الله وتفرحنا بااول مولد لك ان شاء الله...

[مهاجر وطن]

الف مبرووووووووووووووووووووك <<<<<<<< ينتظر الرد شنو صااار

[أتعبني غروري]

بقولك شي يا نايف احس ان امك توها صغيره صح والام مهما كان عمرها تغار من زوجة ولدها فا بقولك شي اذا كنت انت من اول تقول لمك كل شي قلها كل شي الا شي واحد بس لا تقولها عن زوجتك شي ابد الا اذا كان شي عادي يعني مو سر وانتبه تمدح زوجتك عند امك تراها اتغار تراه حريم نجد غيورات مره
انا زوجي كان يجي يزورني وماحد يدري انه زارني مع انه كان يقول لمه كل شي الا عني
والان زوجي يقول لمه كلشي الاعن حياتنا ماتدري وش نسوي طبعن حنا ماعندنى شبكه لان اهل زوجي ماتفتحو ومايعرفون الاشياء هاذي :)

وشف اهل زوجتك متفتحين ام لا اذا كانو متفتحي سو اللي قالته هدوء واذا كانو مو متفتحين
فا لاتسوي اللي قالته لك هدوء وعلمني علشان اعلمك وش اتسوي وانت عود زوجتك انك تزور اهلك كل عصر تدري انا زوجي وش مسوي ثاني يوم جو اهله يشوفوني ثالث يوم راح يشوف اهله ثم سافرنا يوم رجعنا راح يشوف اهله تقل له عمر ماشافهم بس تصدق انها حلوه الطريقه هذي تدري ليه لانهم راح يفكرون ان زوجتك حبوبه وتعينك على بر والديك

واذا تبي نصايح زياده علمني

وقلي اهل زوجتك اصلهم من وين ووين ساكنين ومن متى
علشان اعطيك معلومات زياده
واسفه اني دخلتك باشياء مووقته بس مهمه

والله يوفقكم ويجمع بينكم بخير ويسعدكم دنياء واخره

[Naif_M]

اشكر أعضاء المنتدى على المرور والتفـاعل

يسلمو اتعبني غروري على مرورك ونصايحك

لا أهل الزوجه متفتحين ومتفهمين ... وعرفتهم معرفه كأني ابن لهم ... لانهم شاريني :cool:

ومن ناحية كـلامك كله على العين والراس ... الوالدهـ انا اول ولد اتزوج لها ... يعني بـ النسبه لها تجربه جديدهـ ... و مابيني وبينها اي اسرار حالياً ... بس بعد الزواج راح يكون نفس الشيء الا عن حياتي الزوجيه ...
لان كلامك نصحوني فيه ناس كذالك من ناحية الغيرهـ

يعطيك العافيه على نصايحك واهتمامك ويخليك ربي :)

[هدوء]

نايف انا اول من يبارك لك الف مليووووووووون مبروك اول تبريكه بعد العقد والله يجعلها شمعه بين عيونك وسكر بين سنونك....

[اخر الكلام]

لولولولولولولولولولولولولولولولولولولولولولولولولو ووووويييييييييييي << تزغرت ههههههه
الف الف الف مبروووووووووووووووووك نايف وعقبال فرحتك الكبيره
الله يجمعكم على خير والله يجعلها قدم خير وسعاده عليك يارب العالمين
وانتي يا هدوء وين وين يا نور العين لو سمعتك خطيبة نايف رحتي فيها وما حفكك منها :m315:
وتسأيلن بعد وش بيسير ياحليلك مابتاخذين من الرجال ولا فايده بس استريحي وانصحيني انا :zr287:وبعلمك وش يسير في الملكه هذا في حال اني ملكت ههههههههههه

[Naif_M]

الله يبـارك لك أيــامك إنشاالله ... فاجأتيني ان يوم الشبكه مانسيتيه :m315:
وحقيقـة اشكر تفاعلك واهتمامك ... وربي يعطيك العــافيه
الشبكة كانت أمس الإربعــاء ...

:rolleyes: ممكن حابه تعرفي التفــاصيل
بس بيني وبينك ( حلوووهـ بيني وبينك في منتدى :D ) الأمور جرت بسلاسه فوق ماتصورت
اول حلم لي تحقق انو سلامي لها كان حاااار ( على الخد )
وفيه شيء حقيقه صدمني وتعجبت وأعجبت حقيقه فيه ... انو البنت كانت جرئية بزيادهـ
ومتفاعله معاي ومتعاونه ورمنسيه ... الى درجة انو الجراءاه اللي فيها غطت علي :eek:
يعني تصوري انو كل سواليفنا كانت عيننا ببعض ...
بس هذا الشيء اعجبني وبزيادهـ .... انا ما أقول انو ماهي خجوله
هي خجوله وجريئه في نفس الوقت
وحركة العقد اللي علمتني أياها طبقتها بـ حذافيرها (( خصوصاً كلمه يابعد قلبي )) وانا أربطه لها
وجلست معاها لحالنـا أحلى جلسه رومنسيه للآخر .. حدود الساعه والنص
وبـ النسبه لي عدة كأنها لحظات

وبأقي التفاصيل راح اسردهـا في وقت آخر

[#الحلا#]

يالله انتظر البقيه


والف مبروك الله يوفقكم

[Naif_M]

الله يبارك فيك الحلا....

[هدوء]

افاء عليك نايف بالعكس كل اللي بالمنتدى اخواني ويهموني واذكر مناسباتهم اكثر من مناسباتي...

غير كذا الله يوفقك والحمدالله هذي توفيق الله ثم دعوتنا لك...الله يسخرها لك يارب ويسخرك لها

والحمدالله انها فاهمه ومتجاوبه معك وانك انت واعي وقدرت جرئتها معك وفسرتها صح ماصرت زي بعض الشباب


بس بجد نايف عيش كل يوم معاها كانه اليوم الوحيد (من غير شر ان شاء الله)بالرومنسيه بحياتك معاها...

واجلسس معاها جلسه وقول لها وش انت تبي منها وهي وش تبي منك..

اللبس عند الناس وعندك بالبيت طريقة العبايه الاشياء اللي تزعلك الاشياء اللي تجذبك الاشياء الصعبه فيك..
لما تكون معصب كيف تبيها تتعامل معك.........الخ


واذا ودك بحركات وقت ماتزورها مانقصر ان شاء الله معك

[Naif_M]

شكراً أختي هدؤ على ردك وكـلامك الجميـل

حقيقـه نصايحك اعتبرهـا ذهب وآخـذ فيهـا مباشرهـ من دون مشـاورهـ

بس عندي سؤال ... بمـا أني حـالياً أعيش الفترهـ اللتي مابين الملكه والشبكه ... واللتي بعض الناس يسمونها بفترة الحب العـذري ... ( أنا أشهد أنها أحلى فترات حياتي )
طبعاً مستقبـلاً لابد اني أزور البنت في بيتهــا
متى في ظنك أفضل وقت للزيــارهـ ... وكم الفـترهـ اللتي تفصل بين كـل زيـاردهـ وزيـاردهـ
بحيث ان أهل البنت مايقولون عني ويش يبي هذا النشبه .... وفي نفس الوقت مايقولون عني
هذا زياراته قليله ويجينـا كل شهر مرررهـ ( يعني مقصر )

وكم معدل الوقت اللي راح اقضيه بـ الزيـارهـ الواحدهـ

:rolleyes: أحس اني زوتها شوي بـ الأستفسـار !!!؟؟!؟

حاجه ثـانيه ... انا ما أعرف من المفرض يتصل بـ الآخر ... بس اللي أشوفه وعايشه حـالياً
أتصالاتها فيني أكثر من أني أتصل فيهـا حبيبة قلبي
يعني أنا كلمتها مرررهـ بعد الشبكه بعدهـا كل الأتصالات تكون واردهـ منها

حاجة ثـالثة ... انا الى الحين احس ان مكالماتي معاها رسميه شوي ... يعني يالله بـ القوه افتح معاها موضوع ... وأحسب للكلمه الف حساب قبل لا أنطقهـا ... مو ضعف في شخصيتي ولا شيء
بس لان أمرهـا يهمني ولا أبي أجرح شعورهـا بدون ما أقصد بكلمه
وكيف أقولها ايش اللي يعجبني وايش اللي مايعجبني ... وكيف أفرض عليها طلب
للمعلوميه ( انا باقي خجول شوي مع الجنس الناعم ):confused:

الله يعطيك العـافيه مقدمـا ويخليك ربي وآسف على الإطـاله

[هدوء]

متى في ظنك أفضل وقت للزيــارهـ ... وكم الفـترهـ اللتي تفصل بين كـل زيـاردهـ وزيـاردهـ

من وجهة نظري تشوف كم باقي على الزواج بحيث يكون قبل الزواج ب6اسابيع ماتشوفك ولاتشوفها عشان تتغير شوي عليك وتشتاق لها اكثر..وهي بعد
حلو تزورهم مره كل اسبوعين او3...وتكون جلستك بين ساعتين و3ساعات وتكون بعد المغرب مثلا اى بعد العشاء.. وزياره وحده بالشهر تكون سهره يعني تجي بعد الساعه9(((تعشاء في بيتكم لو سمحت خخخخ-والله صدق-))واجلس عندها لحد 2باليل,,

اترك مجال للبنت اذا بتروح المول عشان تجهز..وقبل تزورها بااسبوع حط عندها خبر...انك جاي باليوم الفلاني والساعه الفلانيه ان شاء الله..

بحيث ان أهل البنت مايقولون عني ويش يبي هذا النشبه .... وفي نفس الوقت مايقولون عني
هذا زياراته قليله ويجينـا كل شهر مرررهـ ( يعني مقصر )



اهلها لو ردت لهم يمكن مايبونك الا مره كل شهر...بس ماعليك انت منهم اي والله بعد الليالي الملاح>>>حلوه الملاح!!

ماتتكرر
زورهم زي ماقلت لك بس لاتطول يعني نص ساعه ساعه ونص بالكثير هذي زيارات المغرب..
>>واذا ع التقصير بسم الله عليك راعي مواجيب من اللحين حاط احتياطك..

مو قايلين مقصر ولا شي تطمن بس اهم شي((لاتكثر الدوس على خلك يملونك))


ما أعرف من المفرض يتصل بـ الآخر ... بس اللي أشوفه وعايشه حـالياً
أتصالاتها فيني أكثر من أني أتصل فيهـا حبيبة قلبي
يعني أنا كلمتها مرررهـ بعد الشبكه بعدهـا كل الأتصالات تكون واردهـ منها

عادي ماتفرق ..انت او هي مو مهمّ المهم تسمعون اخبار بعض..وباين انها حبتّك وبتتعلق فيك..حاول تحتويهاوتكون حنون معاها بس اهمّ شي ماتتصنع تصرفاتك..بس بيجي وقت فجئه كذا راح تفقد اتصالاتها وتصير انت اللي تدق وتسوي عليك ثقل هههههههه

شرايك مره تدق عليها بنص الليل تصحيها اهم شي تكون عارف انها نايمه وتصحيها وقولها((بس بقولك احبك ومشتاق لك وعسانى ماانحرم قربك..تصبحين على خير واسف اني ازعجتك))


حاجة ثـالثة ... انا الى الحين احس ان مكالماتي معاها رسميه شوي ... يعني يالله بـ القوه افتح معاها موضوع

ابد ياطويل البقى والسلامه اذا في بالك موضوع مثلا...فلنفرض مثلا اذا مممممم بتجهز الشقه..
سكر عيونك وقولها حبيبتي بغيت رايك اليوم اخذت شقه مواصفاتها كذا وكذا..شرايك!!

يالمره شرايك امرك تشوفينها اذا عجبتك اعتمد واذا لا اشوف غيرها واذا طلعت معك ودها الشقه شوف رايها وتناقش معاها كيف تبي الاثاثّّ!!وقبل ترجعها البيت مر بها كوفيّ بالثلاثين او التحليه ورجعها البيت..

ممممممممم عطني موضوع مو عارف تفتحه معاها واساعدك فيه

وكيف أقولها ايش اللي يعجبني وايش اللي مايعجبني ... وكيف أفرض عليها طلب
للمعلوميه ( انا باقي خجول شوي مع الجنس الناعم


ابد اذا رحت لها للبيت((اول زياره لاتروح ويدك فاضيه مر خذ لك شوكولاه من جهينه باتشي روز جوي..الخ الشلّه هذي))

بعدين اذا رحت لها اخبار وعلوم وجديد وقديم بعدين قول لها بااعرفك على نفسي اكثر انا انسان هادئ بطبعي مو عصبي..الخ احب كذا واكره كذا العناد الكذب ...الخ

احب تحطين في بالك اللي بيني وبينك يبقى بيني وبينك لان ماحد يعرفني ويعاشرني ويعيش معي غيرك خلينا نبني حياتنا مع بعض بدون اقتراحات وافكار غيرك نعيش زي مانبي واللي يناسبنا...

اذا غلطتي اول مره بسامحك واذا كررتيها بعاتبك واذا عديتها تحملي اللي بيصير...
والكلام يجر بعض


بعدين اشوف العرق السعودي ينبض وبقوه ((كيف افرض عليها طلب))يااخوي الحياه الزوجيه مافيها افرض فيها نتفاهم ونوصل لحل يرضى الطرفين..

تقدر تقول كيف اقنعها بشي انا ابيه ..اقول لك حسب اسلوبك في طرح الطلب..

بعدين لاكثرت اسئله ولا شي احنا بالخدمه

[¨°•√♥ بنت الاصول ♥√•°¨]

نايف جحدهـ

المفروض انك تملكت

بس ما عطيتنا الاخبار وماقلت وش صار معك


بصررررررررررررعه هات الاخبار :m315:

[#الحلا#]

انا في نظر وسع صدرك وصدرها بهذي الايام واذا اهلها مو متشددين على جيتك رح لها عااااااااااادي لاتصير حساس عااااااااااااااادي هي زوجتك خلاص واقول لك لاتبخل على نفسك ولا عليها بالكلام الحلو والحركااااااااات واذا تقدر تطلع معها اطلع معها


اترك عنك الحذر والخجل لاتضيع هذي الايام

والله اني متحسفه على ذيك الايام انا كنت خجوله وهو بعد يعني رااااااااااحت عليناااااااا

[Naif_M]

يسلمووو أختي هدؤ و أم مشعـل والحـلا على المرور والتفـاعل
وآسف على التأخر في الرد

أختي هـدؤ ... الف شكر على ردك الجميل ونصائحك الذهبيه
فعـلاً الحياة مشـاركة :) ... وتفاهم بين الطرفين ...
وأشكرك انك نبهتيني على هـ النقطه
وباقي كـلامك كله على العين والراس ... وتسلمين على أهتمامك

ام مشعـل ... :rolleyes: لا جحدهـ ولا شيء
بس المواقف اللي صارت لي وقت الشبكه حلوووهـ وجرت بسـلاسه تـامه
الا البعض منها للأسف ماعرفت اتصرف فيهـا ... ( يعني جبت العيد :confused: )
وحسيت بخجـل ... وامنيتي يرجع الوقت
وأعـدل اللي سويته بـ الغلط
على غير بعض المواقف الآخرى اللي كانت خارج إرادتنا

الحـلا ... اشكر نصايحك ... وفعـلاً انا شايف انها احلى فترات حيـاتي الايام اللي اعيشها حـالياً
والله يقدرني اسعـد خطيبتي لأني حيـل احبهـا ... وهي برضو محتوتني بحبها وحنـانها
والله يخلينـا لبعـض ... ويجمعنا على خير إنشالله

[#الحلا#]

آآآآآآآآآآآآآمين يارب العالمين الله يسعدكم ويجمع بينكم في خير ويرزقكم الذريه الصاااااالحه

[¨°•√♥ بنت الاصول ♥√•°¨]

هههههههههههههههههه نايف وسع صدرك الجايات اكثر


عاد اعزمنا بالزواج خخخخخخخخخخخ اتخيل المنتدى كله جالسين بزاويه بالصاله

[المأذون السريع]

احسن شئ العرق السعودى ههههههههههههههههه

1000 مبروك يا نايف

وسوال للاخوات ماهى المسموحات بعد الملكه وقبل الزواج اذا كان باقى عن الزواج 6 شهور

مثلا" ؟؟؟؟؟؟؟؟ اقصد من السؤوال ماذا تفضل الانثى ؟؟؟ والى اى حد ؟؟؟؟؟

[بطل الهيلا]

هذي قصة مسلسل
:d:d:d:d:d
هههههههههههههههههههههههههههههههه

[فتاةالجبال]

نايف انشالله الف الف الف مبررررروك فرحنالك يالغالي ما بغيت تملك وتفكنا من شرك هههههههههه امزح
بس وانا اختك ابي اقولك شي مهم مهم مهم احس اني فاقدته في خطيبي من لما ملكت ما عرفت اتفاهم معاه فيه وهي انك لاتقعد تحسب الاتصالات وكم المرات الي انت اتصلت عليها او هي اتصلت عليك فيها يعني المفروض المشتاق للثاني يتصل انا اشوف خطيبي ما يتصل الا مره بالاسبوع هاذا لو اتصل وانا صراحه ما عودته اني اتصل يعني من 4 شهور من الملكه ما اتصلت غير مرتين وما انصحكم تسوون زيي .........
بس كمان وانا اختك لا تنسى تزورها ترى البنت احلى يوم بحياتها لما يجي زوجها يزورها بس انتبه لا تكثرها يعني مره كل اسبوعين كفايه وطبعا ساعتين كفايه و هاذا في اثناء عدم حضور النشبه وهم اخوان البنت بس لو هم ملزقين الله يعينك عليهم .......
وكمان ابي اقولك شي لا تكون حساس انت وياها زياده عن اللزوم يعني مو كل كلمه تقولها لك انت تفهمها غلط والعكس وهذا طبايع اغلب المملكين هالايام لاااااا لازم تفلونها وتونسوا صراحه من يوم ملكت وانا في حلبة مصارعه مع خطيبي:mad: ((((((وش قصدك بالهكلمه وايش تقصدين بالكلمه)))))) صرااااحه مللللل .....
وكمان خذها واطلعوا تمشوا عااااااادي ولا يهمك كلام احد هي زوجتك مو بنت من الشارع بس لازم معاكم احد من اخوانها الصغار لان شكل نهاية خجلك هذا بتفكها على البنيه هههههههههه:p
وش بعد وش بعد وش بعد اها اييييييييه ولا تنسى امك امك امك ما دام انت الاول من اخوانك الله يعين امك عليك انت وزوجتك يعني تكفى تكفى تكفى لا تمدح زوجتك قدام امك ولا تجيب طاريها كلللللللللللش والله العضيم والله العضيم يانايف ان امي جاها انواع الحزن على اخوي الكبير لما تزوج ورح تفتح على نفسك باب انتم في غنى عنه وبعد لو انت بخاطرك تسكنها في نفس بيتكم العود انصحك لاااااااا والف لاااااااا احسن لك من البدايه خلك بعيد بس لو انت تحس ان خطيبتك بنت حلال وتفهم على اهلك زين خلاص الله يوفقكم بس انا من شوري روح ببيت لحالكم لان حتى اهلك مارح ياخذون راحتهم في بيتهم اكثر ......وكمان بما انك الكبير في اخوانك اذا مثلا تزوجت وانشالله قريب ورحت ببيت لحالك مع زوجتك لا تترك بيتكم العود وتفلها مع زوجتك وتنسى امك لازم كل يوم تزورها وتقعد معاها ومو ضروري كل مره تروح عند اهلك تاخذ المدام معاك لان اهلك ساعات يبون يسولفون معاك سواليف بعيد عن زوجتك وصدقني رح يتضايقون مرررررره ووصيتي لك الله الله في امك يا نايف لا تاخذ عقلك المدام وتنسا ست الحبايب الله لا يخلينا منها
صدقني هالكلام نابع من قلبي ومن تجربه عايشتها وهذي وجهة نظر اغلب البنات
والله يوفقك وياها ويكتب لكم السعاده والذريه الصالحه يارب وتقبل مروري

[Naif_M]

مشكورهـ أختي فتاة الجبـل على الرد الجميل والنصائح الثمينه

ومن ناحية كـلامك هو بـ الظبط اللي انا عـامله الحين ... بس عندي مـلاحظة عليك وعلى خطيبك !!!؟
كيف تصبرون على بعض في الأتصالات ... أحس انها قليله مرررهـ في الأسبوع
مادري هو ثقل من قبل الزوج ولا خجل ... بس الحمد لله انا اللي فيني خجل بس مو مثله
يعني ممكن 3 مكالمات في اليوم مني ومنها
يعني الصباح العصر وآخر الليل
على غير المسجــات اللي بـ الهبل بيني وبينها
وبخصوص الزيارات انا اشوف مرهـ كل أسبوع ولا كـل أسبوعين كافيه
والسكن مايبيلهـا ... شقه مع حبيبة العمر وأريح راسي من القيل والقال والمشـاكل ... يعني ناخذ راحتنا أكثر من ناحية التصرفات واللبس والحركـات :rolleyes:

يعطيك العافيه على مرورك ومانستغني عن نصايحك

[هدوء]

نايف الله يوفقك ويسعد قلبك يارب...
اي مساعده تطلبها احنا بالخدمه....

وماله داعي للتفصيل..اوكي..>>>>>>>>>>>قصيمي وتفهمّ عليّ

[اخر الكلام]

الله يهنيك ويسعد قلبك وايامك
عيش ايامك بالطول والعرض لا تخلي على قلبك شي بس عاد مو تنسا نفسك اعمل فرامل خخخخخخخ
وماقصرت هدوء ماشاء الله تبارك الله